ENQERE - MYK’a DEM Partiyê dê îro saet di 11.00’an de bi rojevên girîng bicive. Di civînê de dê geşedanên li Rojhilata Navîn, rewşa şer, encamên pêşhilbijartinê û namzetên dê li bajarên rojava bên nîşandan bên nîqaşkirin. 

 

Lijneya Rêveberiya Navendî (MYK) a Partiya Wekhevî û Demokrasiyê ya Gelan (DEM Partî) dê îro bi rojevên girîng bicive. Civîn dê saet di 11.00’an de dest pê bike û Hevserokên Giştî yên DEM Partiyê Tulay Hatîmogûllari û Tuncer Bakirhan serokatiya civînê bikin. 

 

Di civînê de dê gelek rojevên girîng bên nîqaşkirin. Yek ji van jî geşedanên li Rojhilata Navîn e. Pevçûnên di navbera Îsraîl-Filistînê de, êrişa DYA û Ingilistanê ya li dijî Husiyan û êrişên Îranê yên li dijî Herêma Federe ya Kurdistanê bên nirxandin. 

 

DÊ PEVÇÛNÊN HEYÎ BÊN NIRXANDIN 

 

Di civînê de her wiha dê tecrîda mutleq a li ser Rêberê PKKK’ê Abdullah Ocalan û pirsgirêka kurd bi berfirehî bê nirxandin. Pevçûnên di demên dawî de di navbera HPG û TSK’ê de jî dê bên nirxandin. 

 

DÊ MUHESBEYA PÊŞHILBIJARTINÊ BÊ KIRIN 

 

Yek ji mijarên din ên ku dê MYK binirxîne jî pêşhilbijartin in. Dê muhesebeya encamên erênî û neyînî yên pêşhilbijartinan bê kirin. 

 

NAMZETÊN LI BAJARÊN TIRKIYEYÊ 

 

DEM Partiyê biryar dabû ku di hilbijartinê de li hinek bajarên Tirkiyeyê bi namzetên xwe bikeve hilbijartinê. Enqere, Antalya û Bolu jî di nav de biryar hatibû ku li 7 bajar û 27 navçeyan namzet bên nîşandan. Dê kesên li van bajar û navçeyan weke namzet bên nîşandan bên nîqaşkirin. Di vê qonaxê de dê gelek nav bên nirxandin. 

 

Her wiha dê têkildarî navendên ku hêj nediyare bê ka dê namzet lê werin nîşandan an na jî nîqaş bên meşandin.