ENQERE - Parlamenterên HEDEP’ê têkildarî rapora ATK’ê ya ji bo Makbûle Ozer a 81 salî ku dibêje “dikare di girtîgehê de bimîne” serî li Komîsyona Lêkolînkirina Mafên Mirovan a Meclisê da. 

 

Serokwekîlên Koma Partiya Wekhevî û Demokrasiyê ya Gelan (HEDEP) Meral Daniş Beştaş û Sarûhan Oluç û hemû parlamenterên partiyê têkildarî rapora Saziya Tipa Edlî (ATK) ya derheqê Makbûle Ozer de ku dibêje “dikare di girtîgehê de bimîne”, serî li Komîsyona Lêkolînkirina Mafên Mirovan a Meclisê (ÎHÎK) dan. 

 

Di serlêdanê de hat gotin ku Ozer û hevjînê wê Hadî Ozer tevî zarokên xwe di encama serdegirtina malê ya di 24’ê tîrmeha 2018’an de hatine binçavkirin û ji ber îdiayên “endamtiya rêxistinê” û “alîkarî dane rêxistinê” 2 sal û mehek cezayê hefsê li Ozer û hevjînê wê hatiye birîn. 

 

5 MEHAN GIRTÎ MA 

 

Bi domdarî hat gotin ku Ozer û hevjînê xwe di 9’ê gulana 2022’yan de bi awayeke derqanûnî û bêyî delîlan hatine girtin û wiha hate gotin: “Makbûle Ozer pir pîr e, ji sedî 61 astengdar e û neçarî sexbêra zarokên xwe ye. Mayîna wê ya li derveyî malê xetereyê li ser jiyana wê çêdike. Piştî hewldanên parêzerên wê, cezayê wê salekê hate taloqkirin û di 7’ê îlona 2022’yan de hate berdan.” 

 

'XETEREYÊ LI SER JIYANA WÊ ÇÊDIKE’ 

 

Serlêdan wiha dom kir: “Ozer, bi kursiya biteker çû AT’ê lê ATK’ê di rapora 11’ê mijdarê de rapora ‘dikare di girtîgehê de bimîne’ da. Ozer; ji sedî 61 astengdar e, nexweşiyên wê yên weke tansiyon, şekir, bêhnkurt û hwd. hene. Ketina wê ya girtîgehê dê xetereyê li ser jiyana wê çêbike. Dema girtî bi ser hişê xwe çûbû û destê wê şikestibû, nikare bimeşe û ji ber êşên nexweşiyên xwe nikare razê.”

 

Di berdewamê de rapora pisporê tipa edlî ya Prof. Dr. Umît Bîçer hat bibîrxistin. Parlamenteran xwestin ku Ozerê dîsa bişînin ATK’ê, înfaza wê were taloqkirin û ÎHÎK jî vê mijarê bike rojeva xwe û ji bo mafên girtî û hikûmxwaran berpirsyartiyê li xwe bigire.