Nûçegihanê Ajansa Mezopotamyayê (MA) Ahmet Kanbal de lêpirsînek nû hat destpêkirin. Şahidê “veşarî” ê bi navê "K8Ç4B3L1T5" ku li ser rojnamevanên li Enqereyê îfade dabû û di 25’ê cotmeha 2022’yan de hatibûn binçavkirin û girtin û der barê wan de doz hatibû destpêkirin, ev lêpirsîn ango doz hincet hat nîşandan û der barê Ahmet Kanbal de jî lêpirsîn hat destpêkirin. Hat zanîn ku lêpirsîn bi îdiaya “endamtiya rêxistinê” di sala 2022’yan de hatiye destpêkirin û Serdozgeriya Komarê ya Enqereyê biryara “bê erkiyê” daye û dosyeyê şandiye Serdozgeriya Komarê ya Mêrdînê. 

 

Midûriyeta Polîsan a Mêrdînê di çarçoveya vê lêpirsîna hatiye destpêkirin de gazî Kanbal kir. Rojnamevan Ahmet Kanbal û parêzerê xwe Erdal Kuzu bi hev re çûn midûriyeta polîsan û îfade da. Kanbal diyar kir ku beyanên “şahidê veşarî” li dijî qanûnê ne û ew van beyanan qebûl nake. Kanbal piştî îfade da li gel parêzerê xwe ji midûriyetê veqetiyan.