STENBOL -  Hevserokên HDP’a Stenbolê banga beşdariya “Meşa Azadiyê” ya ber bi Gemlikê ve kirin û gotin ji bo çareseriya pirsgirêka kurd pêwîstî bi azadiya Abdullah Ocalan heye. 

 

Hevserokên Rêxistina Partiya Wekhevî û Demokrasiyê ya Gelan (HEDEP) a Stenbolê Mûrat Kalmaz û Gonca Yangoz banga beşdariya “Meşa Azadiyê” ya dê di 18’ê mijdarê de ber bi navçeya Gemlîkê ya Bûrsayê ve ji bo rakirina tecrîda li ser Rêberê PKK’ê Abdullah Ocalan û azadiya wî fizîkî bê lidarxistin, kirin. 

 

‘DIVÊ ÊDÎ BIRÊZ OCALAN AZAD BIBE’ 

 

Hevserokê HEDEP'a Stenbolê Mûrat Kalmaz diyar kir ku Abdullah Ocalan ji roja ku bi komployeke navneteweyî anîne Tirkiyeyê û vir ve di bin tecrîdê de ye û diyar kir ku tecrîda heyî li ser Tirkiyeyê pirsgirêkan kûrtir kiriye. Kalmaz bal kişand ser tecrîda di vê qonaxê de li tevahiya civakê belav bûye û got: “Weke ku tê zanîn dema ku bi birêz Ocalan re diyalog hat destpêkirin, li Tirkiyeyê pêvajoya aştiyê dest pê kir û bi destpêkirina wê pêvajoyê re, ew hêvî bi her kesî re çêbûbû ku wê pirsgirêkên li Tirkiyeyê bi taybetî pirsgirêka kurd çareser bibin û Tirkiye demokratîk bibe. Lê belê bi dawîbûna wê pêvajoyê û tecrîda mutleq re ku 32 meh in li ser birêz Ocalan re, xitimandina pirsgirêka kurd kûrtir bûye û pêvajoyek bi polîtîkayên zext û şer ên li ser kurdan hem li hundir û hem jî li derve li dijî kurdan hatiye destpêkirin.” 

 

Kalmaz destnîşan kir ku di çareseriya pirsgirêka kurd de aktorê herî girîng Abdullah Ocalan e û wiha domand: “Di vê sedsala duyemîn a girîng deji bo çareserıya hemû pisrgirêkan û ji bo aştî pêk were divê ku birêz Ocalan muxatab bê girtin û azadiya wî pêk were. Ji bo azadiya birêz Ocalan û ji bo rakirina tecrîdê em di 18’ê mehê de Meşa Azadiyê li dar dixin. Ji bo azadiyê beşdariya vê meşê gelek girîng e. Em ê di 19’ê mehê de meşa milê Stenbolê li dar bixin û em her kesî vedixwînin meşê.” 

 

BANGA BEŞDARIYA MEŞA AZADIYÊ

  

Hevseroka HEDEP'a Stenbolê Gonca Yangoz jî destnîşan kir ku armanca ku 32 meh in destûr nadin ku Rêberê PKK’ê Abdullah Ocalan bi parêzer û malbata xwe re hevdîtinê bike, astengkirina têkoşîna gelê kurd e û got: “Rêya bidawîkirina tecrîdê di Îmraliyê re derbas dibe. Meşa Gemlîkê ya milê Stenbolê dê di 19'ê mijdarê de li ser vê bingehê bê lidarxistin. Rêya aştiyê bi rakirina tecrîdê û bixwegihandina Îmraliyê re mimkûn e. Em weke Rêxistina HEDEP'a Stenbolê bang li hemû aştîxwaz û azadîxwazn dikin, em bangli jin, ciwan û kedkaran dikin û wan vedixwînin meşa 19'ê mijdarê û bang li wan dikin ku li dijî tecrîdê bibin bêdeng nemînin.” 

 

MA / Îbrahîm Irmak