Çalakiyên 15 Gulanê Cejna Zimanê Kurdî dewam dike. Bi pêşengiya saziyên zimanê Kurdî, Partiya Herêmên Demokratîk (DBP), Tevgera Jina Azad (TJA), Partiya Wekeheviya Gelan û Demokrasiyê (DEM Partî), ji bo daxwaza “Ji Kurdî re statû, Perwerdehiya bi Kurdî” dê 2-3 Hezîranê de meşa girseyê bê lidarxistin.

 

Dê rêwîtî di 2’ê Hezîranê de li navenda bajarê Wanê bi wesayîtan ve dest pê bike. Li navçeyên Bêgirî û Ebexê dê hinek çalaki lidar bikeve. Di 3’ê Hezîranê de ji navçeya Bazîd a Agirî bi wesayîtan ve bi rê bikevin. Dê ji navenda Bazîdê heta Tirba Ehmedê Xanî meşa girseyî pêk bê. Li Bazîdê çalakî û bernameyên cûda dê lidar bikeve. 

 

‘BANGA VEXWENDINA MEŞÊ’ 

 

Dê ji bajarên Wanê, Agirî, Qers, Mûş, Erzirom, Bedlîs, Îdir û Erdexanê gel beşdarî meşê bibin. Ji bo meş û çalakiyan li navçeya Bazîdê belavok hatin belavkirin. Hevberdevkê Komisyona Ziman û Çandê ya DEM Partiyê Heval Dilbihar, di wextê belavkirina belavokan de gel vexwend meşê.  

 

Dilbahar wiha got: “Armanca me ya sereke, bidestxistina statuya Kurdî û perwerdeya bi Kurdî ye. Ji bo vê, li welatê Ehmedê Xanî, em ê vê daxwaza xwe bi dengê herî bilind bînin ziman. Em bangî hemû gele xwe dikin; ji bo ziman û nasnameya xwe em ê di vê çalakiyê de werin cem hev.”